काेपा डेल रे : फाइनलमा बार्सिलाेनाकाे नमिठाे हार

एजेन्सी: लगातार चार सिजनको च्याम्पियन बार्सिलोनालाई हराउँदै भ्यालेन्सियाले कोपा डेल रे फुटबलको उपाधि जितेको छ । नेपाली समयअनुसार आइतबार बिहान भएको फाइनल खेलमा भ्यालेन्सियाले बार्सिलोनामाथि २–१ को जित निकाल्दै उपाधि पोल्टामा पारेको हो ।

यससँगै युरोपियन च्याम्पियन्स लिगबाट आउट भएको बार्सिलोनाको घाउमा भ्यालेन्सियाले अर्को चोट थपिदिएको छ । बार्सिलोना यो उपाधि जितेर च्याम्पियन्स लिगमा बेहाेरेकाे हार थाेरै भए पनि भुल्न चाहन्थ्याे। तर, उसको सपना भ्यालेन्सियाले चकनाचुर पारिदियो ।

रियल बेटिसको घरेलु रंगशाला बेनिटो भिल्मारिन स्टेडियममा भएको खेलमा भ्यालेन्सियाले पहिलो हाफमा २–० को सहज अग्रता लिएको थियो । २१औं मिनेटमा केभिन गेइमेरोले पहिलो गोल गरेका थिए । त्यसपछि खेलको ३३औं मिनेटमा रोड्रिगोले गोल गर्दै खेल २–० बनाए ।

त्यसअघि पनि बार्सिलोना १ गोल खानबाट जोगिएको थियो । खाली पोस्टमा जेरार्ड पिकेले १ गोल हुनबाट बचाएका थिए ।